അന്നു ഞാൻ ജീവിച്ചിരുന്നെങ്കിൽ

അന്നു ഞാൻ ജീവിച്ചിരുന്നെങ്കിൽ....!!!!

•┈┈•✿✿•┈┈•

ജുബൈർ ഇബ്നു നുഫൈർ (റഹി) പറയുന്നു; ഒരു ദിവസം ഞങ്ങൾ മിഖ്ദാദ്ബ്നു അസ് വദ് (റ) വിന്റെ കൂടെ ഇരിക്കുകയായിരുന്നു. അതിലൂടെ കടന്നു പോയ ഒരാൾ പറഞ്ഞു; നബി (സ്വ) യെ കണ്ട ഈ രണ്ടു കണ്ണുകൾക്ക് മംഗളാശംസകൾ... അല്ലാഹുവാണ് സത്യം, താങ്കൾ കണ്ടത് ഞങ്ങൾ കണ്ടിരുന്നെങ്കിൽ എന്ന് ആഗ്രഹിച്ചു പോവുകയാണ്. മിഖ്ദാദ് (റ) കഠിനമായി കോപിച്ചു. അദ്ദേഹം പറഞ്ഞു; അല്ലാഹു തനിക്ക് കാണിച്ചു തരാത്ത ഒരു കാര്യം കണ്ടിരുന്നെങ്കിൽ എന്ന് ആഗ്രഹിക്കുന്ന ഒരാളുടെ അവസ്ഥ എന്താണ്?അത് കണ്ടിരുന്നെങ്കിൽ അയാളുടെ അവസ്ഥ എന്തായിരിക്കും എന്ന് അയാൾക്കു തന്നെ അറിയില്ല. അല്ലാഹുവാണ് സത്യം…!നബി (സ്വ) യെ കണ്ട ഒരുപാട് ആളുകളുണ്ട്. അവരെ അല്ലാഹു നരകത്തിൽ മുഖം കുത്തി വീഴ്ത്തിയിട്ടുണ്ട്. കാരണം അവർ അദ്ദേഹത്തിന് ഉത്തരം നൽകിയില്ല. അദ്ദേഹത്തിൽ വിശ്വസിച്ചതുമില്ല...

•┈┈•✿✿•┈┈•

നിങ്ങൾ നിങ്ങളുടെ റബ്ബിനെ മനസ്സിലാക്കി എന്നതിൽ, നിങ്ങളുടെ നബി (സ്വ) കൊണ്ടു വന്നതിൽ വിശ്വസിച്ചു എന്നതിൽ, മറ്റുളളവർ പരീക്ഷിക്കപ്പെട്ട കാര്യത്തിൽ നിങ്ങൾ രക്ഷപ്പെട്ടു എന്നതിൽ നിങ്ങൾ അല്ലാഹുവിനെ സ്തുതിക്കുന്നില്ലേ? നബിമാർ നിയോഗിക്കപ്പെട്ടതിൽ വെച്ച് ഏറ്റവും കഠിനമായ അവസ്ഥയിലാണ് മുഹമ്മദ് നബി (സ്വ) നിയോഗിക്കപ്പെട്ടത്. ജാഹിലിയ കാലഘട്ടം... ; ബിംബാരാധനയെക്കാൾ മെച്ചപ്പെട്ടതൊന്നും അവർ ദീനായി കണ്ടിരുന്നില്ല. അപ്പോഴാണ് സത്യവും അസത്യവും വേർതിരിച്ചു കൊണ്ട് അദ്ദേഹം വരുന്നത്. നബി (സ്വ) യെ കണ്ടിരുന്നെങ്കിൽ എന്നു നാം ആഗ്രഹിക്കാറുണ്ട്. അങ്ങനെ എങ്കിൽ ഖുറൈശികൾ അദ്ദേഹത്തെ ഉപദ്രവിച്ച സമയത്ത് നമുക്കദ്ദേഹത്തെ സംരക്ഷിക്കാമായിരുന്നു. ത്വായിഫുകാർ കല്ലെറിഞ്ഞപ്പോൾ നമ്മുടെ ശരീരം കൊണ്ട് ആ കല്ലുകളെ തടുക്കമായിരുന്നു. ഹിജ്റയുടെ നാളിൽ അദ്ദേഹത്തിന് കവൽക്കാരനും കൂട്ടുകാരനുമാകാമായിരുന്നു. ഉഹ്ദിൽ അദ്ദേഹത്തിന്റെ രക്തം ഒഴുകാതെ അദ്ദേഹത്തെ സംരക്ഷിക്കാമായിരുന്നു. ജൂത സ്ത്രീ നൽകിയ വിഷം പുരണ്ട മാംസം അദ്ദേഹത്തെ ഭക്ഷിപ്പിക്കാതെ നമുക്ക് ഭക്ഷിക്കാമായിരുന്നു. ഇങ്ങനെയൊക്കെ ആഗ്രഹിക്കുന്നതിൽ തെറ്റൊന്നുമില്ല. അത് വിശ്വാസത്തിന്റെ അടയാളമാണ്. നബി (സ്വ) യോടുളള സ്നേഹമാണ്.

•┈┈•✿✿•┈┈•

എന്നാൽ നാം മനസ്സിലാക്കണം... നാം ജീവിച്ചിരിക്കാൻ ഏറ്റവും അനുയോജ്യമായ കാലത്താണ് അല്ലാഹു നമ്മെ സൃഷ്ടിച്ചിട്ടുളളത്. മുസ്ലിമായി ജനിച്ചു എന്നുളളതാണ് ഏറ്റവും വലിയ അനുഗ്രഹം. അല്ലെങ്കിൽ ഇസ്ലാം സ്വീകരിക്കാൻ അവസരം ലഭിച്ചു എന്നുളളത്... !

മറിച്ച് ഒന്ന് ആലോചിച്ചു നോക്കൂ... നാം നബി (സ്വ) യുടെ കാലഘട്ടത്തിൽ ഖുറൈശി തറവാട്ടിൽ ജനിച്ചു. മാതാപിതാക്കൾ നമ്മെ വിഗ്രഹാരാധകരായി വളർത്തി. ഹുബ് ലിനെയും, ലാത്തിനെയും മനാത്തിനെയും നാം ദിവ്യന്മാരായി കണ്ടു. അങ്ങനെ കളളു കുടിയനും പലിശ ഭുജിക്കുന്നവനും പെൺമക്കളെ കുഴിച്ചു മൂടുന്നവനുമായി നാം വളർന്നു.

•┈┈•✿✿•┈┈•

പിന്നീട് ബിംബാരാധനയെ എതിർക്കുന്ന ഒരാൾ നിയോഗിക്കപ്പെട്ടു എന്നു നാം കേൾക്കുന്നു. ആ സമയത്ത് അദ്ദേഹത്തെ സ്വീകരിക്കാതെ ജീവിച്ചാൽ എന്തായിരിക്കും നമ്മുടെ അവസ്ഥ? അതിനാൽ മുസ്ലിമായി ജീവിക്കാൻ സാധിച്ചതിൽ അല്ലാഹുവിനെ സ്തുതിക്കുക.... ഈ ഹിദായത്ത് നമുക്ക് പ്രയാസമില്ലാതെ ലഭിച്ചതാണ്. ഹിദായത്തു നേടാൻ മാതാപിതാക്കളെ എതിർക്കേണ്ടി വന്ന സഅദ്ബനു അബീവക്വാസിനെ പോലെയല്ല നാം...!!! സ്വത്തു മുഴവനും വിട്ടു കൊടുത്ത സുഹൈബു റൂമിയെപ്പോലെയുമല്ല നാം….!!! അവരെല്ലാം നേരിട്ടത് കടുത്ത പരീക്ഷണങ്ങളായിരുന്നു.പലരും വീണുപോകുന്ന തരത്തിലുളള പരീക്ഷണങ്ങൾ... ഒരു അഅ്റാബിയുടെ പ്രാർത്ഥന എത്ര മനോഹരം!!!അല്ലാഹുവേ, ഞങ്ങൾ ചോദിക്കാതെ തന്നെ ഞങ്ങൾക്ക് നീ ഇസ്ലാമിനെ തന്നു. ഞങ്ങൾ ചോദിച്ചു കൊണ്ടിരിക്കുന്ന സ്വർഗത്തെ നീ ഞങ്ങൾക്ക് തടയരുതെ....പ്രിയരെ, ലഭിച്ച ജീവിതം ധന്യമാക്കുക. വിശ്വാസവും സൽകർമ്മങ്ങളുമായി മുന്നോട്ടു പോവുക, റബ്ബ് കനിയട്ടെ.