മരണത്തെക്കുറിച്ചുളള അശ്രദ്ധ....
┈•✿❁✿•••

അശ്രദ്ധ അപകടമാണ് എന്നു നമുക്കറിയാം. ജീവിതത്തിലെ ഏതെങ്കിലും മേഖലകളിൽ
അശ്രദ്ധ കാണിച്ചാൽ അതു കൊണ്ടുണ്ടാകുന്ന അപകടങ്ങളെക്കുറിച്ച് ബോധമുളളവരാണ് നാം. അതു കൊണ്ട് തന്നെ ശ്രദ്ധയോടെയാണ് മുന്നോട്ട് നാം സഞ്ചരിക്കുന്നത്.
എന്നാൽ നമ്മുടെ ജീവിതത്തിൽ ഉറപ്പായും സംഭവിക്കുന്ന മരണത്തെക്കുറിച്ച്
നാം അശ്രദ്ധരല്ലേ? ജനനമാണു മരണത്തിനു നിദാനം. ജനനം സംഭവിച്ചോ, മരണവും ഉറപ്പ്. മരണത്തിനു വലുപ്പച്ചെറുപ്പമോ ഉച്ഛനീചത്വമോ ഇല്ല. ആദം നബി (അ) മുതല്‍ അന്തിമ മനുഷ്യന്‍ വരെ അലംഘനീയമായ ഈ വിധിക്കു വിധേയനാണ്.
(നബിയെ) നിനക്ക്‌ മുമ്പ്‌ ഒരു മനുഷ്യനും അനശ്വരത (മരണമില്ലായ്മ) നൽകിയിട്ടില്ല എന്നിരിക്കെ നീ മരിച്ചെങ്കിൽ അവർ (മരിക്കാതെ ) നിത്യജീ വികളായിരിക്കുമോ? (21: 34)

ഓരോ സമുദായത്തിനും ഒരു കാലാവധിയുണ്ട്‌. അങ്ങനെ അവരുടെ കാലാവധി വന്നെത്തിയാൽ അവർക്ക്‌ ഒരു നാഴിക പോലും വൈകിക്കുക യോ നേരത്തെ ആക്കുകയോ ഇല്ല (7: 34)

മരണം സത്യമാണ്. ചുറ്റിലും നടക്കുന്ന മരണങ്ങളെക്കുറിച്ച് നാം അറിയുന്നു. എന്നിട്ടും നമ്മുടെ മരണത്തെക്കുറിച്ച് ആലോചിക്കാനും പാഠമുൾക്കൊളളാ നും നമുക്കാവുന്നില്ലെങ്കിൽ ? നബി(സ്വ) പറയുന്നു: “ആസ്വാദനങ്ങളുടെ അന്തകനായ മരണത്തെ നിങ്ങള്‍ ധാരാളമായി സ്മരിക്കുക” (തുര്‍മുദി). ഒരാൾ മറ്റൊരാളോട് ചോദിക്കുകയാണ്: നിനക്ക് മരിക്കാന്‍ കൊതിയുണ്ടൊ? അയാള്‍ പറഞ്ഞു: ഇല്ല. അതെന്തേ? അയാള്‍ പറഞ്ഞു: എനിക്ക് പശ്ചാത്തപിക്കണം, ഒരുപാട് സല്‍കര്‍മ്മങ്ങള്‍ ചെയ്യണം. എങ്കില്‍ ഇപ്പോള്‍ തന്നെ അപ്രകാരം ചെയ്തു കൂടെ? അയാള്‍ പറഞ്ഞു: സമയമുണ്ടല്ലൊ, പിന്നീട് ഞാന്‍ ചെയ്തോളാം. ഇതാണ് നമ്മിൽ പലരുടെയും അവസ്ഥ. അല്ലേ? ആലോചിച്ചു നോക്കൂ, മരിക്കാനിഷ്ടമില്ല, സല്‍കര്‍മ്മങ്ങള്‍ ചെയ്യാനും ഒരുക്കമല്ല. അല്ലാഹുവിന്നായുള്ള കര്‍മ്മങ്ങള്‍ വൈകിപ്പിക്കുന്ന മനുഷ്യന്‍ ദുനിയാവിന്റെ ഒരു പ്രവൃത്തിയും മാറ്റിവെക്കുന്നേയില്ല!
┈•✿❁✿•••

ഒരിക്കല്‍ ഹസനുല്‍ ബസ്വരി(റ) മരണാസന്നനായ ഒരു രോഗിയെ സന്ദർശിച്ചു. അദ്ദേഹം മരണവെപ്രാളത്തിന്റെ അവസ്ഥയിലാണ്. അയാള്‍ അനുഭ വിക്കുന്ന മരണ വേദനയുടെ പ്രയാസവും കാഠിന്യവും അദ്ദേഹം നോക്കിക്കണ്ടു. കുടുംബത്തില്‍ നിന്നും പുറപ്പെട്ടപ്പോഴുണ്ടായിരുന്ന മാനസികാ വസ്ഥയിലല്ലായിരുന്നു വീട്ടിലേക്ക് തിരിച്ചു ചെല്ലുമ്പോള്‍ അദ്ദേഹം. കുടുംബക്കാര്‍ പറഞ്ഞു: ഭക്ഷണം കഴിക്കൂവീന്‍. അദ്ദേഹം പറഞ്ഞു: പ്രിയ കുടുംബമേ, നിങ്ങള്‍ തിന്നുകയും കുടിക്കുകയും ചെയ്തു കൊള്ളുക. ഞാനിന്നൊരു മരണം കണ്ടു വരികയാണ്. ഒരുനാള്‍ ഞാനും അതിനെ നേരിടുംവരെ എനിക്ക് അധ്വാനിക്കേണ്ടിയിരിക്കുന്നു.
┈•✿❁✿•••
അബ്ദുല്ലാഹിബ്നു ഉമര്‍(റ) പറയുന്നു: “ഞാന്‍ നബി(സ്വ)യുടെ സദസ്സിലേക്കു കടന്നുചെന്നു. പത്തോളം പേര്‍ സദസ്സിലുണ്ട്. അതിലൊരു അന്‍സ്വാരി നബി (സ്വ) യോടു ചോദിച്ചു. അല്ലാഹുവിന്റെ റസൂലേ, ജനങ്ങളില്‍ ഏറ്റവും മാന്യനും ബുദ്ധിമാനും ആരാണ്? തിരുമേനി(സ്വ) പറഞ്ഞു: ജനങ്ങളില്‍ ഏറ്റവും മരണസ്മരണയും മരണത്തിനു തയ്യാറെടുപ്പും ഉള്ളവന്‍. അത്തരക്കാര്‍ ഇഹലോകത്തു ബഹുമതിയും പരലോകത്തു ശ്രേഷ്ഠതയും കരസ്ഥമാക്കി” (ഇബ്നുമാജ).
┈•✿❁✿•••
പ്രിയരെ, അശ്രദ്ധ വെടിയുക. ശ്രദ്ധയോടെ ജീവിതത്തെ മുന്നോട്ട് കൊണ്ടു പോവുക. എത്രനാൾ എന്നറിയാത്ത ജീവിതമാണ് നമ്മുടെതെല്ലാം. നശിക്കാത്ത ലോകത്തിന്റെ വാതിലാണ് മരണമെന്ന് മറക്കരുത്. യാത്രാ വിഭവമൊരുക്കി മുന്നേറുക. ഈ റമദാൻ അതിന് കരുത്തു പകരട്ടെ...

സ്നേഹ പൂർവ്വം
സമീർ മുണ്ടേരി
ജുബൈൽ